Råd for den første tida etter operasjon for ganglion i hand, handledd eller finger
Det er vanleg med ømheit og moderate smerter i operasjonsområdet dei første dagane. Bruk smertestillande slik du har fått beskjed om, og følg den tilrådde doseringa. Paracetamol er ofte tilstrekkeleg.
Ikkje kombiner ulike smertestillande utan at dette er avklart med lege. Ta kontakt dersom smertene aukar etter først å ha blitt betre, eller dersom dei ikkje let seg lindre med smertestillande.
Råda frå kirurgen er tilpassa kvar ganglionet var plassert og korleis operasjonen vart utført. Desse råda går framfor generell informasjon.
Hald handa over hjartehøgd så mykje som mogleg dei første 3–4 dagane. Dette kan redusere hevelse, bløding og smerter. Legg gjerne handa på ei pute når du kviler og om natta.
• Hald bandasjen rein og tørr.
• Skift bandasjen dersom ho blir våt, skiten, gjennomtrekt eller laus.
• Bandasjen kan vanlegvis sitje på i 7–10 dagar, eventuelt fram til stinga skal fjernast, dersom du ikkje har fått annan beskjed.
• Ta kontakt dersom bandasjen forskyv seg eller kjennest for stram.
• Sting som ikkje løyser seg opp av seg sjølve, blir vanlegvis fjerna etter 10–12 dagar hos fastlegen eller etter avtale med oss.
• Rør fingrane forsiktig med ein gong etter operasjonen.
• Rør handleddet berre så mykje bandasjen tillèt.
• Når bandasjen er fjerna, kan du gradvis starte med varsam rørsletrening av handleddet.
• Unngå tung belastning og aktivitet som gir tydelege smerter den første tida.
Kor raskt du kan gå tilbake til arbeid og trening, er avhengig av inngrepet og kva slags arbeid du har. Litt stivleik og ubehag kan vare i nokre veker. Dersom du ikkje får tilbake normal rørsle, bør du kontakte lege for vurdering og eventuell tilvising til handterapi.
Kontakt Spesialisthuset, fastlegen eller legevakta dersom du får:
• aukande smerter etter nokre dagar
• feber eller redusert allmenntilstand
• puss eller vond lukt frå såret eller bandasjen
• aukande raudme eller hevelse
• hevelse som ikkje går tilbake
• ein bandasje som kjennest for stram
• fingrar som blir kalde, blå eller numne
Eit ganglion kan kome tilbake sjølv etter operasjon. Ta kontakt dersom du merkar ein ny kul eller får tilbake dei same plagene.
.svg){kind=small}
.svg){kind=small}
.svg){kind=small}
