Eit lipom er ei godarta feittkul som ligg rett under huda. Det er ein mjuk kul som veks sakte, vanlegvis ikkje gjer vondt, og som ikkje er farleg.

Lipom er svært vanlege og kan oppstå på dei fleste stadar på kroppen – ofte på armar, skuldrer, rygg eller lår. Mange har lipom utan å vite det, og det er sjeldan behov for behandling med mindre kulen veks, er plagsam eller kosmetisk sjenerande.

Dersom lipomet er stort eller ligg djupt, kan det vere nødvendig å kartleggje med ultralyd eller MR før fjerning.

Kirurgisk fjerning av lipom er som regel ein enkel prosedyre som blir gjort i lokalbedøving. Kirurgen legg eit snitt over kulen, løyser lipomet frå omkringliggjande vev og fjernar det. Snittet blir sydd igjen med sting som løyser seg opp av seg sjølv. Inngrepet tek som regel 20–30 minutt, og pasienten kan som oftast reise heim kort tid etter prosedyren. Risikoen for komplikasjonar er låg, og tilhelinga går raskt for dei fleste.